Maayong aga, mga bata! Kilala niyo bala si Mimay? Siya ang bata nga may nagalupad nga alibangbang sa babaw sang iya ulo. Anum siya ka tuig, mabuot, kag malipayon. Ang iya alibangbang nagalain-lain color depende sa iya ginabatyag.
Sa ila balay, importante gid ang pag-ilistoryahanay. Nagpaalam ang iya Nanay Bebe nga malakat pakadto sa tinda. "Dali di bi, pwede kahalok kag ka kiss si nanay?" pamangkot sang iya nanay. "Sige nay," sabat ni Mimay, kag ginhakos siya sang iya nanay.
Malipayon nga nagpungko si Mimay sa ila sala agod nga mag-ubra sang iya assignment nga 'Trusted Adult Tree'. Gindrawing niya sanday Tatay Ramon, Nanay Bebe, Manong Eman, kag Manang Bernie. Sila ang mga tawo nga ginasaligan ni Mimay.
Pagkadugay-dugay, nag-abot si Tatay Ramon kag may dala nga Barbie Doll. "Salamat, Tay!" hambal ni Mimay. Nagpamangkot si Tatay Ramon, "Pwede makahakos si tatay?" Malipayon nga ginhakos ni Mimay si Tatay Ramon, kag ang alibangbang nag color yellow.
Pagkadasun nga adlaw, gindul-ong ni Tatay Ramon si Mimay sa gate sang eskwelahan. "Halong anak, kag pamati gid kay Teacher ha?" siling ni Tatay. Nag-high five sila ni Mimay kag Tatay Ramon antes siya magsulod.
Sa sulod sang classroom, nagalagsanay sila sang iya mga classmate. Gulpi lang ginkaptan sang isa ka classmate ang braso ni Mimay sing kusog. "Agay!" siling niya, kag nag color red ang iya alibangbang. "Pwede mo lang man ko kuwiton, kay wala ko namian kung ginakaptan ako sang kusog," paathag niya.
Papuli na si Mimay kag nagahulat sa gwa sang gate. May nagpalapit nga isa ka Manong Helper kag ginhatagan siya sang dulce. "Salamat po," hambal ni Mimay, kag nagayuhom siya samtang nag color yellow ang iya alibangbang.
Naghambal si Manong Helper, "Gusto mo sa dason halampangan naman? Basta maupod ka sa akon kag indi ka manugid biskan kay sin-o." Tingala si Mimay. Nag color orange ang iya alibangbang, kag sang ginsilingan siya nga bawal isugid bisan kay nanay, nag color red ini.
Maayo lang kay nag-abot si Manong Eman, kag nagdalagan palayo ang lalaki. Ginsugid ni Mimay ang ginhambal sang lalaki. "Chakto ang tudlo ni nanay, bawal kita magsekreto kapin pa gid kung bad nga secret," hambal ni Manong Eman. Nangin yellow liwat ang alibangbang.
"Lakat ta, mapuli nata. Ano gusto mo nga pamahaw?" pamangkot ni Manong Eman. Malipayon nga nagsinggit si Mimay, "Dal-a na ang akon bag kag mabakal ta didto fishball!" Nagdalagan si Mimay pakadto sa baligyaan sang fishball, nga may dako nga yuhom sa iya guya.